早排受「黑客」入侵網站事件困擾嘅港交所（00388）行政總裁李小加，尋日抽空同一班大埔青少年見面，分享一下自己嘅成長經歷同人生經驗，仲一講就成個鐘有多，都算非常有心。
大家都知，李小加一生傳奇，細細個時喺內地甘肅生活極為貧窮，十六歲已出嚟做鑽井工人，後來讀番書，更到美國留學，取得新聞系碩士學位及法學院博士學位，喺美國做過律師事務所，返嚟香港後加入投行做「賓架」，依家更搖身一變成為掌管上市公司總市值近19萬億元嘅港交所CEO，絕對係時下「邊青」嘅學習同勵志對象。
有份促成今次活動安排嘅證券學會會長李細燕同絲絲講，同李小加商量呢個活動已一段時間，由於就嚟九月要開學了，李小加喺百忙中抽咗一個空檔出來見青少年。李細燕仲讚小加講得好，話自己細個成長時雖然艱苦，但冇唔開心。生活雖艱苦，但心中富有。在場嘅青少年都覺得感動同有共鳴，仲畀咗一堆書李小加簽名，將會帶到四川送畀當地嘅學生。
原來證券學會有份合辦呢個「生命投資計劃」，主要係幫助16至18歲嘅邊緣青年，扶番入正軌，如他們喺半年後進展理想，就會獎勵去四川做義工，擴闊視野，增加人生經驗。
余絲韻