喺智能手機與平板電腦平地一聲雷之下，世界最大PC大佬惠普，終要向「後PC時代」低頭，宣布基於策略性評估後，決定分拆或全部出售個人電腦業務部門，將發展重點重新放在軟件和雲端服務上。表面睇唔代表PC「走到末日」，但反映了隨着消費和企業行為模式上嘅轉變，PC真係冇前途。
講真，惠普PC業務面對嘅係結構性樽頸問題，即係PC業務利潤微乎其微，出貨加上PC整體銷售增長乏力，激烈而無期待嘅市場競爭局限咗PC生產商盈利，相比之下蘋果Mac電腦的邊際利潤仲有15%。我同好多粉絲都棄PC同Notebook，寧取iPhone同iPad。同時，好多電腦已由桌面式轉為口袋流動裝置，企業運算和數據儲存，都逐漸採用雲端儲存服務，令到後者更有空間同有利可圖。
如果大家有留意IBM，IBM喺○五年將PC業務賣畀聯想（00992），惠普資產價值近年確係逐漸下跌，IBM透過研發及提供高利潤的分析軟件和服務，保持強勁營收。IBM用咗6%收入做科研，惠普就只得2%，高下立見。Google收購「無得撈啦」已經宣告咗流動商貿正式開始，而美國管理大師彼得杜拉克講過，二十一世紀企業嘅功能只有營銷同創新。呢兩樣嘢已喺Apple同Google身上體驗，所以，選股同樣都要用呢種思維模式開始，收到未呀？
香港大學電子金融服務榮譽助理教授 徐燦傑