繼優酷網之後，內地從事網上視頻業務、排名第二嘅土豆網（Tudou）終於成功喺美國納斯達克市場上市，雖然招股定價麻麻哋，但喺早前美國市場經歷一場「清洗中資股」嘅浩劫後，上到市已經好叻。
近年內地興起嘅視頻分享網站競爭激烈，由於片源需要成本，所以「燒錢」好大，若未能成功吸引風險投資基金或私募基金入股，就好難維持落去，土豆網就係其一，好彩佢哋獲新加坡政府投資機構淡馬錫青睞，投資咗3,500萬美元，有「大水喉」射住當然好好多。佢哋近期播緊嘅36集時尚大戲《無懈可擊之美女如雲》，自本月五日開播以來，據悉累積播放量已突破一億次，成為繼《神話》後，土豆網第二部播放量逾一億次嘅電視劇。
土豆網今次登陸美國，成功集資約1.74億美元（約13.57億港元），發售價為29美元，係招股價範圍28至30美元嘅中間價，單從定價睇，大家可能以為唔錯，但其實較其競爭對手優酷網現股價折讓達58%，約16倍嘅市盈率，亦遠低於優酷網嘅37倍，絲絲認為喺依家市況下，土豆網要成功上市難度確實好大，如果唔喺售價上作出讓步，相信成事機會好微。
余絲韻