孖妹缸湖遊：熊真的來了？

技術上，當股市喺年內高位回落逾20%，就係轉入「熊市」，至於點解幅度要係20%就不得而知，睇番恒指今年高位係四月嘅24,468點，至上周二低位18,868點，就跌咗22.89%。呢兩個幾月港股都處於俗稱「牛熊分界線」嘅250天移動平均線之下，喺七月更出現「死亡交叉」，即係50天線跌穿250天線，形勢相當不利。

林：英皇證券（香港）銷售部副總裁林建華

黃：荷合股票衍生部董事黃集恩

Eddie：中信證券國際證券零售業務及證券業務發展主管林一鳴

熊市先兆 反彈再插

祺祺：你話之前經歷嗰兩年牛市唔係「純天然」，何解呢？

Eddie：嗰兩年嘅牛市都係「人造」嘅，受美國量化寬鬆政策（QE）帶動，恒指先可以由約10,000點衝上20,000點水平，之前「牛一」、「牛二」都只係幻象，當市場出現超壞嘅消息，可能會出現歷史上首次跳過「牛三」而進入「熊一」嘅情況。

高妹：咁依家究竟係「牛」定係「熊」呢？

林 ：恒指早前喺24,000點攀升乏力，而且一浪低過一浪，相信依家已踏入熊市，換言之港股未行完三期嘅牛市就已轉「熊」。要喺熊市獲利其實係「少做少錯」，要持盈保泰。

Eddie：要判斷係咪熊市，最主要可留意市場氣氛及技術分析。好多人會喺「熊一」博反彈，有一半人會對熊市嘅來臨半信半疑，而股市只會慢慢跌，下挫後會輕微反彈，然而又再回落；但到咗「熊三」，我哋就會見到指數急跌，幾乎全部人都估個市會繼續冧。另外，如果依家仲係牛市，恒指唔可以違背波浪理論中「四浪底高過一浪頂」嘅定律，否則若恒指未來兩周收市跌穿19,162點，喺低位維持兩、三日，跌到18,000點水平，可能就已跳過「牛三」而走入「熊一」喇。通常「熊一」之後會出現大反彈，有機會收復期內一半跌幅，然後再急插，令市場信心完全崩潰。當股價回落到底就會急速上升走入「牛一」，少數願意買股票嘅投資者令股市急升，當指數升到估值合理水平就會橫行，呢個就係「牛二」，根據「道氏理論」，大部分人喺「牛三」都睇好後市，股市會進入瘋狂狀態。

中國經濟強可撐港股

祺祺：咁你又點睇基本因素？

林 ：歐洲出現骨牌效應，後市要睇歐債危機如何演化，依家出事嘅唔只「歐豬五國」，仲傳會禍及當地第二大國──法國，又話法興及法巴會因持有大量希臘債券而不穩，搞到當地市場好多沽盤。你會話好似美國咁可印銀紙，違約風險好低，但無力償債嘅歐元區成員唔可以自己開動印鈔機，區內成員共同用嘅貨幣唔可以話印就印。所以歐洲業務比重高嘅股份更加唔掂得，滙控（00005）都比較危險，恒指回落到18,800點就可吸納中電信（00728）、領匯（00823）及中移（00941）呢類股票。

Eddie：美國經濟會係「一個尖底」後再出現「平底鑊」，即係會重蹈日本覆轍陷入衰退，但未來唔似會突然死得好慘，5年內會維持喺低息、印銀紙、失業率高企及經濟零增長嘅情況。當地失業率仍高企喺9.1%，經濟政策無力製造就業，而QE泵嘅水流唔到入實體經濟，喺通脹出現嘅同時，大部分人冇人工加，所以一向佔GDP（國內生產總值）逾70%嘅消費業就會轉差，拖累經濟更弱，可以話係一個惡性循環。雖然港股會受美國經濟拖累，但唔會一齊經歷「日本息死亡」，相信缺口可由內地填補，中國要喺未來5年錄得7至8%經濟增長好容易。

高妹：牛市及熊市嘅投資策略有乜唔同？

Eddie：牛市時股價會不斷推高，買咗貨喺期內都唔會輸，但到咗「熊一」就要避一避，超級「武林高手」可博「熊二反彈」。跌定後，投資者先可以揸貨，又或者吸納之前被拋售、股價跌至不合理水平嘅股份，捕捉之前跌浪一半嘅升幅。

祺祺：金價已經屢創新高，仲可唔可以追入？

林 ：金價見頂後會大幅調整，要等回調先好買，金礦股最好揀經營上游業務嘅招金礦業（01818），此外亦可留意SPDR金ETF（02840）。

未來兩周恐跌見18800

高妹：呢排港股下晝3時後波幅擴大，上周二喺三時後衝上20,158點，之後跌回19,330點收市。

黃：雖然近日環球資產市場走勢由美股主導，但港股亦反映歐債因素，當歐洲喺本港時間下晝3點開市，恒指波幅會擴大；呢排恒指波幅指數充分反映專業機構投資者對市場預期，最高升過58.6%。港股早前急速滑落，散戶要留意手上窩輪嘅行使價與現價距離，若條約已轉為深入價外，意味着槓桿好高，會擴大投資風險。

祺祺：咁你哋點睇未來兩周嘅恒指走勢？

林 ：我相信恒指未來兩周低位可能會喺18,800點，最高或會上試20,500點，近期市況係整固居多，揸貨唔係時候，如果喺之前一晚道指暴跌500點，第二朝就可以即市博反彈。

　Eddie：恒指短期都會跟美國行，未來兩周有一半機會跌穿19,162點。如果穆迪或惠譽下調美國評級，會對金融市場帶嚟波動。好多國際金融機構都持有美債，內部投資規則講明，可以揸穆迪或標普評AAA級嘅債券，但最近有啲機構將條款放寬至評級AAA債券或美國國債，但企業債不在此列，所以若美國再被降級，國債價也未必大跌，但金融機構會急沽部分美國公司債，對佢哋影響好大。呢個消息好致命，好大機會令港股踏入熊市。

29.6%股友身家蒸發逾半

標準普爾下調美國主權評級至「AA+」，觸發全球股市震盪，孖妹嘅股票身家本月都蒸發咗一半，股友們又輸幾多？據今期《東方日報》網上民調截至上周末晚上6時嘅結果顯示，29.6%人嘅身家蒸發一半或以上，蒸發四成嘅佔11%，蒸發三成及兩成嘅分佔19%及18.8%，蒸發一成嘅佔13.8%，其餘7.8%「世外高人」就力保不失，身家甚至有所增長。

高妹、祺祺

如果有料報畀高妹同祺祺或有嘢問，可電郵money.biz@opg.com.hk