市場熱線：百麗內需股首選

美股上個禮拜坐過山車，但上周五亞洲魚缸已冇陪佢癲，恒指僅微升，不過ADR就勁咯，升470點報20,091點，恒指今朝會唔會上試兩萬關口，仲要睇日韓台嘅走勢，但古勝上個禮拜用開市後反方向操作理論相當使得，今日如果大幅高開亦可以照辦煮碗。

上個禮拜港股大走資600億元，但港紙有少少回升，呢個禮拜應該可以抖吓氣，牛證殺得八八九九變得供不應求，或掉轉殺熊。輪民呢排好傷，因為引伸波幅大升，上周二大跌市曾見Call、Put齊升，好多輪溢價升到兩成以上，上周五個vol一縮，結果Call輪喺升市亦大屠殺。

調控力度有望放鬆

呢排亦係政策市，火車減速又減價，飛機乘機起飛，航運股都反彈。另外，祖國話將鉛酸電池門檻大幅提高，有一半公司要淘汰，所以超威（00951）上周五狂升14.3%創新高，天能（00819）亦升6.7%。

古勝近排另一睇法係A股可以跑贏其他股市，滬綜指上周五續升0.45%，七月新增貸款得4,926億元人仔，M2增長14.7%，兩個數據支持收水力度可以放鬆，食品股最開心，康師傅（00322）連續3日創新高，祖國即食麵又加價，呢隻股市值已去到1,400億元，夠條件染藍，但上周五恒指季檢未有佢份。

呢排比較好樣嘅藍籌股係邊幾隻？祖國移動（00941）、恒安（01044）同百麗（01880）是也，總之同歐美經濟愈少關連愈好，屬民生用品更加好，所以造廁紙同衞生巾嘅恒安最着數，隨時因紙價回落而更好賺。至於隻百麗，雖然係賣高檔鞋，但以祖國同胞嘅消費力來講亦未驚過。

喺歐美都話要勒緊肚皮嘅日子，祖國同胞嘅消費力變晒豪客，下個月阿爺仲大手筆減稅，月入4,500蚊人仔嘅打工仔都唔使交稅，至於月入1萬蚊人仔嘅中產階級都可以減稅，每月慳番幾舊水可以買多對鞋；月入萬幾嘅冇加冇減，高薪一族就要交多啲稅，但有錢人有法子避稅，所以消費力亦冇受影響。

同店銷售增長理想

講番百麗，今年以來股價上升25%，主要係因為今年上半年同店銷售有理想增長，大行亦不斷調高佢嘅目標價。百麗今年第二季鞋店同店銷售增長兩成，亦新開咗755間新店，依家喺內地共有9,153間鞋店同4,000間體育用品舖，可算係「內需王」。

百麗嘅中期成績表亦肯定靚仔，到時要睇大行會唔會提高佢嘅估值，隻股今年預測PE約25倍，但本地零售股都要十幾倍PE，以佢千幾億市值嘅「內需王」來講仍算合理，所以值得捧場。

古勝