絲絲講場:內地三強iPhone煙幕戰

近日市場經常傳出iPhone 5快將登陸中國,最新傳聞係內地三大電訊商將分別推出三款唔同版本嘅iPhone,言之鑿鑿,真係信不信由你!始終都係香港簡單得多,美國喺九月出iPhone 5,香港就跟住十月有得賣!

中移傳十月推簡化版

絲絲聽聞近日頻頻有動作嘅中移(00941),早前大力建設Wifi網絡,事出必有因,早前有外國媒體已報道話中移與蘋果公司有共識,最快喺今年十月率先推出簡化版iPhone 4,而呢款簡化版嘅iPhone 4正正係用Wifi上網。不過,要引入iPhone 5又或者早前傳過嘅TD-LTE版(即4G版嘅iPhone),怕且起碼要明年先有得諗,中移客戶惟有繼續等吓先啦!

另邊廂,又有傳中電信(00728)將於今年十月推出iPhone 5以及「簡化版iPhone 4」,更有傳中電信將花費30億美元(約234億港元)引入iPhone 5。不過,開講又話「耳聽三分假」,呢啲冇根據嘅傳言,絲絲就唔係幾信喇!

至於依家內地唯一有賣iPhone嘅聯通(00762),市場普遍認為,一旦蘋果公司推出iPhone 5,聯通會直接引入,但當然極有可能會遲過美國及香港推出。

余絲韻

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!