由王國安任會長嘅證券及期貨專業總會，喺「軍師」仗義幫助下，終於完成咗六千多字嘅長文，逐點反駁港交所（00388）行政總裁李小加早前撰寫嘅「萬言書」。該會更邀請李小加進行一場公開辯論，下戰書寫道：「你（李小加）會來嗎？」
證券及期貨專業總會一向反對港股加時，駁斥港交所所指「與內地交易時間同步是強化價格發現功能」，認為係莫名其妙嘅論據，因為同一公司嘅A股與H股，係兩個市場唔同取向嘅投資者參與。該會認為所謂價格發現功能，只係港交所主觀上要市場有意識咁定出一個跟內地走勢嘅開市指導價，但多咗被利用嘅渠道，往往被有心人利用作為定價操控，扼殺牛熊證等目的。
至於為解決「讓百萬內地投資者直接開戶」而研推嘅遙距參與者制度，該會認為美其名係接軌，實質係害怕內地開拓國際板，流失在港嘅逾百萬內地客戶。從公平角度，該會質疑點解唔提議畀香港經紀都可在香港成為內地市場嘅遙距參與者？
增設期指夜市方面，該會話美國有好多數據都喺周五半夜公布，咁豈非香港要喺周六、周日都要加場？該會又批評李小加將業界嘅反對聲「標籤化」，當作係業界從自身利益考慮、大小戶之間嘅「階級鬥爭」，擺出會用「綜合平衡各方利益」嘅姿態來推行改革。該會更質疑點解李小加到依家仲唔明白，業界要強烈反對有關改革建議，因為「疊床架屋式咁弄出一啲更易於讓港交所操控嘅措施，最終結果只會搞到市場極唔平穩」。
余絲韻