比亞迪（01211）踏入今年嘅賣車表現放緩，公司嘅一舉一動更備受關注，集團尋日突然公布，掌管比亞迪汽車銷售業務嘅副總裁夏治冰由於個人原因已辭職，市場隨即揣測呢位比亞迪嘅「銷售之神」極可能過檔捷豹路虎（Jaguar Land Rover），實行幫兩大英國品牌進一步開拓內地高檔車市場。
比亞迪嘅通告話，夏治冰離任並唔涉及與董事會嘅意見分歧，亦冇任何有關其辭任嘅事宜要股東垂注。但絲絲聽內地汽車界人士講，有唔少人相信夏氏離任與比亞迪汽車銷售表現及新能源汽車嘅部署不無關係，不過以佢過往為比亞迪打開內地汽車銷售網絡嘅經驗，捷豹路虎為進一步拓展市場，邀請佢過檔亦不無道理！
喺比亞迪公布夏治冰辭職前，內地《網易汽車》刊登咗夏治冰嘅一篇訪問，佢話當初加入比亞迪，完全係受到比亞迪主席王傳福嘅感動，睇嚟佢對呢位舊老闆確係敬重有加！
余絲韻