奧巴馬成功協助美國提升國債上限成為近期市場焦點，但估唔到美國一家基金公司發行企業債券都要加入「奧巴馬條款」，令華爾街一眾「財俊」大呼「瘋狂」，搞到絲絲都要即刻了解吓發生乜嘢事。
話說由高盛前舵手兼新澤西州前州長及前參議員科爾津（Jon Corzine）做CEO嘅明富環球（MF Global），將發行一批3億美元嘅5年無抵押債券，發行條款中有一項係，一旦科爾津於二○一三年之前出任聯邦政府職務，有關債券將需要額外多付一厘利息。查實高盛嘅前舵手入政府任職已係平常事，而科爾津本人一直係奧巴馬明年競逐連任美國總統嘅最大捐款者之一，若奧巴馬一旦連任，科爾津入白宮「護駕」嘅機會可謂高唱入雲。
類似嘅「保護條款」常見於由明星級經理操盤嘅對沖基金，而應用喺近年幫明富環球「翻身」嘅科爾津身上，都算「合情、合理、合法」，有一啲較資深投資者，仲嫌一厘嘅「保護費」唔夠高添。
余絲韻