作為小投資者，大股東抵押股份都唔係咁老利。即係變相話畀大家聽，大股東可能有財務上需要，一個唔好彩，對股價構成壓力，到嗰時，佢間上市公司股價嘅波動性，又會忽然「動起來」。
近期，港交所（00388）權益披露咗Swatch持有亨得利（03389）股權由百分之九，一下子增持到兩成，但又唔講作價，主席兼大股東唔知係咪因為「真的假不了，假的真不了」畀一眾分析員追問下，自爆自己抵押股份畀Swatch，換咗一億美金返來，話用作私人財務安排。
大家都知，大股東抵押股份，肯定係股價敏感消息，連最基本嘅企業管治都冇，真陰功。最慘仲係，大股東對現金難求嘅迫切性都非常強勁，折讓四成都肯。講真今次Swatch肯做埋銀行嗰份，借錢畀大股東，實在太有意思。大家都知道亨得利做高級手錶買賣，有成300個銷售點，食正近年內需嘅風眼。Swatch其實由○六年起不斷買緊亨得利，不過，Prof J覺得Swatch應該向「大福先生」好好學習。
如果我係Swatch，真係想望大股東冇錢還，一個唔好彩做咗第二大股東，又可以拉攏其他基金股東，將亨得利嘅潛在價值完全釋放出來都咪話唔犀利，繼續追蹤永無放鬆。
香港大學電子金融服務榮譽助理教授 徐燦傑