投行幾乎每日都會發表研究報告，要喺芸芸報告中突圍而出，除咗靠分析員嘅實力及知名度之外，有時真係要搞吓噱頭引起大家嘅話題。好似里昂咁，以往佢哋嘅分析員都試過親身感受上市公司嘅產品或服務，以第一身嘅體驗去做分析，今次佢哋就街頭直擊深高速（00548）嘅公路，睇吓究竟可唔可以鬥贏新開通嘅深圳地鐵一號線。
今次直擊嘅起點及終點分別係福田及深圳機場，一位分析員會坐的士行公路，另一位就坐地鐵，兩人都喺下午3點即係往機場人流最繁忙嘅時段出發，睇吓喺時間、車資、舒適程度等各方面，地鐵會唔會搶咗深高速嘅收入。
結果車資成本真係一面倒，深圳地鐵只需8蚊人仔就可以搭到去機場，搭的士就要105蚊人仔，不過搭的士就可以慳番好多時間，福田出發行深高速營運嘅南坪快線，之後轉行合和公路（00737）營運嘅廣深高速公路，全程只需35分鐘，可以話路路暢通，而且坐的士唔使轉車，大把位放行李，梗係舒服啲啦。
至於坐地鐵，途中經過22個站，全程就花咗1小時20分鐘！分析員仲好詳盡咁話，坐最尾一卡車，到第8個站先至有位坐，中途又逼人又唔夠位放行李，又要中間花15分鐘轉車，好辛苦。所以得出嘅結論就係，深高速仍然具競爭力，絕對可以吸引商務客或一家大細選擇經高速公路去機場，其股票市盈率及市帳率分別可以有14.9倍及1.39倍，評級係「買入」。雖然被唱好，但深高速股價尋日就冇升跌，收報4.11元。
余絲韻