近年有好多海外公司來港上市，為咗爭奪新股IPO服務，唔少公司紛紛進軍證券登記呢項業務，繼新加坡最大證券過戶處Boardroom來港做「過江龍」後，絲絲最近發現，早前盛傳透過獵頭公司向銀行業挖角、有意染指本港證券登記業務嘅歐資大行法巴，最近已攞正牌，成為證券登記公司總會嘅會員。
據絲絲了解，若要喺香港進行股份過戶登記業務，必須向證券登記公司總會申請認可，並知會證監會。市場人士估計，港交所（00388）近年積極拉攏多家歐洲奢侈消費品牌來港上市，喺歐洲有強大先天及地利優勢嘅法巴自然會把握機會，喺保薦人以至證券過戶處等業務上提供「一條龍」服務，力吸歐洲企業客。
此外，早前市傳已經喺法國上市嘅法國巴黎銀行有意以介紹形式來港上市，並已向港交所提交上市申請。法巴動作多多，睇嚟真係想喺香港大展拳腳！
余絲韻