絲絲講場:新地贊助參觀書展 郭炳聯教細路睇好書

每年書展盛事,絲絲都希望睇到多啲有意義嘅活動及好書推介,今年新地(00016)就連續第4年搞「新地齊讀好書」計劃,由副主席兼董事總經理郭炳聯(Raymond)坐鎮,佢仲話有本書令佢諗起先父郭德勝添。

讀古書憶先父教誨

原來Raymond最近睇咗兩本好書,其中一本係《曾文正公家書》,即係晚清重臣曾國藩嘅家書,入面提到做人嘅大道理─勤力、節儉、謙虛,Raymond話與佢先父嘅教導一樣。另一本好書係《箴言精選六十則》,書中提到「每事問」、「忌死頂」、「業精於勤荒於嬉」,令Raymond覺得除咗可以勉勵學生,連新地員工都啱用,所以好醒目咁大量買入派畀員工。

今次活動,新地贊助咗200位基層兒童去參觀書展,與呢班9至14歲嘅小朋友分享閱讀興趣,每人並獲240蚊現金津貼買書。

有小朋友問咗一條絲絲都覺得好奇嘅問題:「Raymond日理萬機,邊有時間讀書?」呢位大老闆就話事在人為,最緊要識分配時間,例如瞓唔着或放假嘅時候就睇多啲書,最重要係可以「修身」兼成為公司員工嘅好榜樣喎;另外,Raymond亦與時並進,開始用iPad讀電子書添。

余絲韻

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!