冼國林師傅依家係國藝（08228）揸Fit人，為咗搞好佛山「西樵山夢工場」呢個項目，真係紮行晒馬，佢尋日喺當地一次過出席第一期工程奠基儀式、黃大仙祠落成儀式以及醫療中心、流動醫療車啟用儀式。
睇黃飛鴻電影常聽到「贈醫施藥」呢四個字，呢個優良傳統喺西樵黃大仙祠亦實現到，入面有贈醫施藥醫療中心以及流動醫療車，都係由李兆基基金會主席李兆基博士（四叔）捐贈。
冼國林話，醫療中心旨在為有需要人士提供免費中醫服務，服務對象包括廣東省嘅困難戶、五保戶及孤寡老人等，有幾位經驗豐富嘅執業中醫師長期駐診，每日為首30位病者免費贈醫施藥。中心亦備有兩架流動醫療車，每日專車送醫、送藥下鄉，為居住喺偏遠山區嘅居民送上健康及問候。
「四叔」尋日冇現身，但絲絲見到佢嘅親家徐傳順（徐子淇父親）以及黃英豪，佢兩位都係香港資源（02882）嘅執董。作為「西樵山夢工場」嘅頭炮項目，西樵黃大仙祠尋日正式開幕供遊客參觀，早前並已與香港6家旅行社簽訂合作協議。
余絲韻