孖妹缸湖遊:美息.美匯.美股後市拆局

孖妹相識滿天下,尋晚我哋就去咗參加一班美國朋友嘅派對,預早慶祝獨立日。美國經濟差就係人都知,老友Samantha就話當地最近做咗個調查,發現有三分之一受訪者好唔鍾意自己份工,仲諗住辭職唔做,但美國近月新增職位減少,打工仔想轉工都難。不過美國始終係國際經濟嘅火車頭,唔知未來美股、美息及美匯嘅走向係點呢?

潘:富邦香港投資策略及研究部主管潘國光

林:晉裕環球資產管理投資研究部董事林偉雄

美企業績主宰股市

祺祺:與QE(量化寬鬆措施)講完拜拜後,環球市場第三季表現係咪會唔掂呢?

 潘:股市及商品指數喺三、四月見咗頂,先行反映對QE2完結嘅負面因素。我預期環球市場氣氛喺七月至八月中仍會中性偏淡,就算希臘問題過到骨,市場仍會翻炒意大利、西班牙、葡萄牙等歐洲地區嘅壞消息,呢啲國家採取緊縮經濟措施,經濟冇得增長,又如何達到財政盈餘目標?若國際間認定一、兩個國家已係「Too Big To Fail」(大到不能倒),並持續貸款畀冇能力還錢嘅國家,將來受牽連嘅唔只係一、兩個國家,帶嚟嘅問題只會更嚴重。美國好有機會喺八、九月推出新嘅寬鬆措施,若股票或商品價格跌破六月低位,就係買貨時機,但今次炒起幾多就好難講。

 林:美股業績期會喺本月中展開,頭幾間企業嘅業績足以主宰第三季環球股市走勢。港股近兩個月已由高位跌逾1,000點,但美股冇乜大調整,所以企業要交出令人滿意嘅盈利及業績去支持估值。如果美股公布嘅業績唔理想,又或者投資者唔滿意管理層表現,市場會進行重估而令股價大挫。

美元唔會跌得太殘

高妹:資產價格攀升係因為貨幣貶值,當有新嘅寬鬆措施推出,外幣、股票及商品價格一定有得升,最反映到貨幣貶值因素嘅股票板塊自然係資源類股。當美國再推貨幣政策,美匯咪又係冇運行。

 林:佔美匯指數成分最高嘅係歐元、日圓及英鎊,但歐元區、日本及英國嘅經濟與美國可以話係「鬥衰」,當呢3隻貨幣走勢依然疲弱,美匯指數短期內唔會再大插至下試71,只會窄幅上落。如果美匯跌得太殘,就冇人會買國債;不過強美元亦不利出口,對美企盈利都冇好處。

 潘:呢排美元兌瑞士法郎創新低,我估美匯指數短期仍會喺73至77徘徊,不過八月中會再次下跌。

聯儲料下月再出招

祺祺:金融市場啲熱錢係咪已經流走晒?

 潘:有報道指兩輪QE完結後,美國嘅資產負債表仍會維持於約2.6萬億美元規模,流動性充足,唔會進入緊縮狀態。隨着聯儲局早前買入嘅債券到期,未來12個月將有3,000億美元回流續期,再買入新債券,對比QE2喺6個月有6,000億美元規模,未來一年回流資金按比例得番四分之一。以1.5萬億美元財赤計,美國財政部每月就要發行約1,200億美元新債,回流呢筆錢實在唔夠填數。不過,聯儲局降低美國經濟前景評級,有利傳統上睇淡經濟嘅債券,有助解決財赤問題。

高妹:美國經濟好似一個危在旦夕嘅病人,既然QE冇乜效用,聯儲局主席伯南克幾時會再開藥方呢?

 潘:睇番聯儲局嘅聲明,就知佢哋想再做嘢,美國近月用過好多方法打壓石油等商品市場嘅炒作活動,希望說服市場通脹只係暫時性,QE2唔係元兇。不過市場覺得QE2唔奏效,如果當經濟仲係咁差,聯儲局即刻再推QE3只會捱鬧。我相信美國喺七、八月公布就業等數據都會偏弱,若全球經濟增長繼續放慢、股市呆滯而商品價格冇再飆升,市場要求聯儲局做嘢嘅呼聲會愈嚟愈高,聯儲局可能會喺八月初舉行公開市場委員會會議,又或者喺八月中嘅杰克森雷爾(Jackson Hole)會議宣布新措施。

 林:美國總統奧巴馬提過可能會有加稅措施,不過一切計劃都要提交眾議院,所以好難講係咪會喺本月公布新動作。聯儲局肯定唔會喺短期內推出QE3,但美國數據依然疲弱,失業率高企而樓市未見起色,提振經濟嘅新方案係事在必行。美國能源組織(IEA)釋放油儲都係為咗刺激經濟,推低油價先可以刺激美國國民嘅購買意欲,相信政府會積極干預市場,由稅務、住宅資助方面推出政策,以提高民望迎接出年大選。

祺祺:有分析指聯儲局可能重推「OT」(Operation Twist),透過公開市場操作「抽水」或「泵水」,究竟乜嘢係「OT2」?

 潘:舉例說10年期債券利率依家係3%,聯儲局可能將目標利率定為2.5%,當每日收市後債券息率高過2.5%,聯儲局就買債,咁樣就出師有名喇。

美加息待明年四月

高妹:咁似乎市場唔單止水源充足,仲可能會水浸喎。

 林:息口政策方面,因為明年大選,聯儲局唔會輕舉妄動,對貨幣流通性只會「寧鬆莫緊」,繼續維持低息環境,市場預期明年四月先有機會加息。喺本港投資市場中,美國經濟對港股影響最直接,例如滙控(00005)股價表現與美國經濟息息相關,至於樓市走勢亦要睇美國息口,取決於美國加息周期。

港股下半年存憂 13.1%人估跌破2萬關

個別股份近日被洗倉狠沽,但仍有不少分析看好下半年港股走勢,你如何看下半年恒指表現?據《東方日報》網上民調截至上周六晚上6時嘅結果顯示,估恒指下半年有力升穿25,000點嘅讀者佔39.9%,31.8%人認為會升見23,000至25,000點,6.1%人話只可於現水平上落,9.1%人話會跌見20,000至21,000點,其餘13.1%人就估會跌破20,000點關口。

高妹、祺祺

若有料報畀高妹同祺祺或有嘢問,可電郵money.biz@opg.com.hk

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!