市場熱線：聯想可作長線投資

恒指上周四升336點，如果今日跟ADR升376點嘅話，兩日加埋升逾700點，好友六月嘅仇乜都報晒，但其實今年好友又死、淡友又死，得大戶賺個盆滿缽滿，睇住邊處人氣旺嚟食。依家都係炒股唔炒市為妙，炒國策嘅係汽車股，話會重推「以舊換新」，但車股已炒咗成個禮拜。另外，零售股長炒長有，除咗繼續傳奢侈品減稅之外，內地個人免稅額加碼到每月3,500蚊人仔，都係為咗推動內需。

渾水魔咒效力大減

基金愛股仆完一隻又一隻，雨潤（01068）洗白白之後，華寶（00336）派成績表大插33%，仲衰過雨潤多多聲，民企股呢排好多無名腫毒。至於雨潤呢兩日已經反彈，傳聞中嘅「渾水報告」冇影，本周刊嘅負面報道其實只係炒冷飯。講開渾水，佢嘅新狙擊目標展訊通信喺納指連續兩日暴漲，對付空軍嘅最佳方法就係挾死佢哋。而經過呢一役之後，渾水摸魚嘅魔咒效力已大減。

七月魚缸能否翻身未知，但新股顯然翻生，雙樺（01241）同藏水（01115）首日掛牌都升逾20%，而比亞迪（01211）A股首日跌眼鏡狂升41%，次日再升一成漲停板。買新股氣氛大過天，尤其係藏水，面對客戶單一、產品單一、水源單一咁多質疑，但貨源歸邊就有得炒。

蘋果電腦一將功成萬骨枯，相反競爭對手諾基亞同摩托羅拉謝晒，連帶微軟同英特爾嘅前景亦被睇淡。聯想（00992）雖然過去一年嘅成績表都好過預期，但孖屣都驚住手提電腦遲早畀平板電腦淘汰，所以幾次業績後都升一浸就冇料到。

平板電腦各有各做

聯想近期有兩單影響股價消息，先係用4.65億歐元買咗間德國公司Medion，由於聯想買IBM個人電腦曾經損手，所以孖屣對公司再度出手都抱懷疑態度。不過，跟住老總楊元慶大手買入公司8%股份，股價當堂順暢番。

聯想股東當然最關心係「樂Pad」成敗，因為平板電腦來勢洶洶，樂Pad掂、聯想就掂。香港潮人可能冇幾多個會用樂Pad，但聯想喺祖國知名度高，市佔率高達32%，而每年電腦付運量複式增長達15%，聯想嘅優勢係中國同新興市場，所謂各有各做，iPad好賣唔代表聯想會衰落。

電腦市場分好多類，有發達市場同新興市場，有商業電腦同個人電腦，個人電腦亦分傳統同娛樂兩種用途，平板電腦主要用於娛樂，iPad點叻都只係佔電腦市場好細份額，孖屣對iPad嘅威脅未免過份憂慮。聯想淨係中國、新興市場同商業電腦已經唔憂做，加埋有往績保證，可以當作長線投資。

戰報

威靈控股（00382）

詩詩上周二睇中嘅威靈，走勢扶搖直上，由當日低位1.5元計，至上周四高位1.7元，可賺逾13%。

英皇鐘錶珠寶（00887）

英皇鐘錶上周二被小尾看中，走勢強勁，當日低位見過1.28元後，上周四已高見1.46元，最多升14%。

古勝