卓爾發展（02098）就快會喺本港上市，絲絲尋日見到主席兼行政總裁閻志，佢不斷重複強調自己做生意之前做過兩年記者，仲要係財經記者。點解會做咗生意人？閻志好自豪咁話，係因為佢有夢想！
佢話做記者唔可以按自己嘅想法自由去做，但做生意就唔同，可以按照自己嘅想法及方式發揮所長，有自己嘅事業咁話。
一個有「夢想」嘅人，講句說話都零舍唔同，閻總成個人望落去都充滿自信，雖然依家個市好似唔係好就，不過淨係講個勢，閻總就贏咗一大步。絲絲縱橫職場咁多年，已經好耐冇聽過啲令人咁振奮嘅說話。
至於閻總嘅「夢想」係乜？佢話依家係希望將卓爾打造為中國最大嘅商品交易品牌，咁佢就心滿意足嘞，佢仲話有信心公司上市會得到投資者嘅支持。據閻總介紹，佢哋公司係做大型消費品批發市場、商務空間提供商及營運商，聽落有啲複雜喎。
余絲韻
