絲絲講場：滙豐慈善基金三十而立
絲絲尋日經過滙豐總行時，發現大堂有唔少人載歌載舞表演，場面非常墟冚，當然要八卦一下。其實滙豐係慶祝緊「生日」，邊個生日值得咁盛大慶祝？原來係滙豐銀行慈善基金成立30周年。
滙豐撥捐3000萬賀壽
咁多年來，滙豐慈善基金嘅慈善捐款已超過10億元，滙豐香港區總裁馬凱博喺致辭時話，為咗慶祝慈善基金30歲生日，滙豐特別準備咗份「生日禮物」，就係向慈善基金額外撥捐3,000萬元。尋日中環傾盆大雨，馬凱博更加即場發揮口才，話水喺中國文化之中代表財富，落咁大雨係好意頭喎。
唔少受過基金捐助嘅機構，都準備咗好多精彩環節喺活動度表演，包括絲帶舞、擊鼓等，最令絲絲印象深刻嘅，係有班年輕人準備咗饒舌（Rap）表演，以Rap形式介紹基金嘅往績，雖然係用廣東話Rap，馬凱博應該聽唔明，不過佢仍然好留心咁欣賞表演。
除咗尋日嘅啟動禮，滙豐亦計劃舉行一系列慶祝活動，包括攝影及繪畫比賽，令公眾可以分享心中嘅理想社區面貌；佢哋亦會推出一個叫「社區達人」嘅網上挑戰活動，鼓勵香港市民了解及發掘不同嘅社區潛能。
余絲韻