市場熱線：中國水務憧憬加費

滬綜指終止6連升，尋日回吐30點，主要係1年期央票利率高過定存25點子，引起加息揣測，內銀股全部腳軟，亦有消息話部分地方企業已拖欠本金，淨係還得起息。內銀股講PE同PB都好吸引，最驚就係壞帳。

古勝繼續講吓雨潤（01068），尋日卒之反彈，早幾日傳有周刊「爆大鑊」，原來只係抽吓水了無新意，而傳聞已久嘅「渾水報告」亦一直冇影，所以雨潤尋日反彈6.8%，成交降到20億元，前日買入博反彈嘅散戶飲得杯落，但呢兩日沽得最兇狠嘅「高佬盛」收市擺晒成棟沽盤出來，幾有嚇鬼效果。

要多睇業績報告

空軍將雨潤幾單舊聞炒埋一碟已賺得盆滿缽滿，而上個禮拜傳出嘅「化妝品同奢侈品減進口關稅」消息到尋日至發揮效用，莫非係等埋「趴打」（01913）上市？尋日米蘭站（01150）、「趴打」同歐舒丹（00973）齊齊發威。古勝一向贊成減奢侈品稅，掃貨唔使去香港或外國咁遠，但靠個人遊旅客嘅莎莎（00178）就可能蝕桌。

有增長兼派高息嘅公司，當然股價亦高升，就好似尋日隻波司登（03998）咁，今日係三月尾年結嘅公司派成績表最後一日，但睇落冇乜邊隻值得留意。睇業績報告係股民必做嘅功課，亦可以尋寶。

中國水務（00855）前日派全年成績表，賺多40%至4.2億元，每股盈利31.24仙，新PE係8.86倍，但公司有唔少特殊收入，計核心盈利PE唔算平。不過，做供水業務係值得較高溢價，阿爺依家傾緊水電油氣價格改革，尤其係水電因為唔夠用，所以改革會較快，構思中最可行嘅係階梯收費，即係用得愈多、價格愈貴，目的係鼓勵用戶節省。水荒嘅問題每年都發生，今年旱災之後又洪災，祖國新消息係「十二五」期間用200億人仔大搞海水化淡，希望解決問題。

財政狀況有改善

中國水務嘅主要業務係供水，同其他水股主要係做污水處理唔同，加水費或階梯收費當然得益最大。集團喺湖南、河南、江蘇、湖北、江西、廣東同重慶都有供水項目，相信未來會陸續搵緊收購同投資機會。上個月有日本金融集團以每股3.4元高溢價認購公司新股，可謂幾大信心，集資咗8億亦有利搵收購項目，依家公司有現金約16.5億元，銀行同CB共負債約24億元，財政狀況已大為改善。

走勢方面，每次浪頂高位都低過上一次，形成一個下降軌，但總算2.5元附近有強勁支持。古勝相信加水費或實施階梯收費可以喺今年內成事，所以隻股可以睇中線，以上次低位2.46元為止蝕。

戰報

廣汽集團（02238）+12%

古晨上周五推介廣汽，當日低位為8.49元，升至昨日高位9.55元計，累積升逾12%。

理文造紙（02314）+11%

理文造紙上周五被高仁睇中後，由當日低位4.27元計，至昨高位4.74元計已進帳11%。

古勝