阿里巴巴（01688）及母公司阿里集團主席馬雲就支付寶控制權轉移一事嘅處理方式，被部分人指未有充分照顧雅虎（Yahoo）及軟銀（Softbank）作為投資者嘅利益，於是有人就猜測馬雲與軟銀主席孫正義嘅關係會因此而出現變化。
不過事實勝於一切，喺尋日舉行嘅軟銀股東會上，馬雲就以高達九成九嘅得票率，成功連任軟銀董事，佢與孫正義關係轉差嘅傳言，可謂不攻自破！
阿里集團作為軟銀喺內地嘅重要投資，軟銀股東自然關注支付寶嘅控制權問題，孫正義尋日向軟銀股東強調有關磋商順利，並重申馬雲作為生意夥伴兼老友，彼此之間非常信任，叫股東唔使擔心。
孫正義與馬雲更加喺股東會上熱烈擁抱，慌死外界唔知佢哋兩人心無芥蒂。
阿里嘅另一重要股東夥伴雅虎尋日咁啱亦舉行股東會，相對於馬雲喺軟銀股東會獲得嘅支持，作為雅虎業務舵手嘅CEO巴茨（Carol Bartz）就難捱得多。
雅虎無論係業績抑或股價表現都令投資者十分失望，有股東更要求巴茨下台，好彩以主席波斯托克（Roy Bostock）為首嘅雅虎管理層仍然力挺巴茨嘅表現，又表明會畀巴茨更多時間完成佢做緊嘅工作，令佢暫時避過下台危機。
余絲韻