絲絲講場：渣打前線快招搶客
銀行界競爭激烈，經常都要諗新意思以吸引客戶，針對香港人乜嘢都要快嘅文化，渣打香港就搞咗個「8分鐘服務承諾」。
渣打香港個人銀行業務主管禤惠儀（Mary）話，由客戶踏入渣打香港分行至享用櫃枱服務，佢哋力求喺8分鐘內完成，如果唔能夠達標，就會捐一蚊畀「看得見的希望」慈善基金。
絲絲覺得服務承諾及捐錢都係造福人群，但係可唔可以兩樣都要呢？
渣打又借助新科技以加快服務速度，年底前全線分行所有前線員工每人都會手執iPad，配對客戶需要，即係無論喺邊個角落，佢哋都會即時搵到資料畀客戶。Mary仲話，依家大約有三成前線員工喺分行會手執iPad，運用佢哋自家出品嘅iNeeds程式了解客戶需要，市面上冇得Downloado架。
人人揸iPad加快服務
每一位前線員工「一iPad在手」，唔單只工作速度快啲，睇落形象都新鮮啲。渣打仲打算統一分行外貌，實行「內內外外」都畀個新形象大家睇，Mary話香港嘅分行就係首批以全新形象面世，旺角、灣仔、中環嘅全新分行將陸續開業，沙田分行就會喺下半年擴充。
人民幣業務喺本港熱烘烘，唔知渣打有冇興趣發行人民幣股票，實行雙股雙幣制呢？渣打香港行政總裁洪丕正就話，要內部再作研究喎。
余絲韻