市場熱線：上海醫藥大有錢途

阿伯話美國經濟較預期差，又冇提QE3，搞到美股即刻變臉，但老美最叻轉移視線，呢排外資成日唱內地經濟會硬着陸，又唱淡A股、內銀、內房甚至人仔。阿爺話係陰謀論，你睇淡咩！反擊嘅最佳方法就係上升，呢幾日人仔創新高，A股亦反彈，所以用激將法呢招都幾有效。尋日滬綜指升1.47%，創三個半月來最大單日升幅，全靠人行由抽水變放水。

真明麗業績難睇好

港股尋日靠地主股撐場方不致多失，但連日散戶築起血肉長城嘅內銀股卒之失守，可謂風水輪流轉，但都唔夠利豐（00494）咁戲劇化，外資一時唱好、一時唱淡，簡直係玩弄於股掌之中。呢排好多股都係上上落落，但明顯水泥同零售屬強勢股，航運同基建則係弱勢股，而且係弱到冇朋友。

稀土漲價，螢光粉價格亦升咗1倍，結果最受害嘅係生產節能燈嘅公司，但睇幾隻有關係嘅股：中國稀土（00769）、真明麗（01868）、雷士（02222）同埋隻達進（00515），得真明麗股價唔掂，隻股已輸怕人，喺月尾派全年（15個月）成績表亦打定輸數。

「趴打」（01913）今日上市，暗盤價微跌，古勝雖然唔多鍾意隻股，但短線亦唔敢睇死。「喼神」（01910）一樣係高PE上市，但喺保母「高佬盛」出錢出力支持之下，尋日卒之浮上水面。散戶冇人敢要，即係貨源落入大戶手上，到收夠貨時則開車。

就好似上海醫藥（02607）一樣，以高PE招股冇乜人睇好，結果頂咗幾日之後就開始潛水，但期間見「高佬盛」、大摩同淡馬錫齊齊增持，「高佬盛」揸住H股達到21.62%，咁落力當然出埋報告唱好，話隻股相當抵買，目標價睇26蚊，預期公司未來三年盈利複合增長達31%，主要受新產品帶動。

重上水面賺番一成

上藥亦被「高佬盛」唱起，尋日升2.45%收報20.85元，但A股升4%更勁，不過H股仍比A股有幾個巴仙輕微溢價。睇番藥業股呢排其實表現麻麻，除咗基本藥物目錄減價之外，阿爺亦關注醫生亂開抗生素。

不過，該行話呢兩個因素對上藥影響只係有限，而且因為藥股估值下降，更有利上藥執平貨購併同業。「高佬盛」信唔信得過見仁見智，但上藥股價應該喺20蚊樓下見咗底，今年預測PE約22倍，以一間咁大規模分銷網絡嘅公司來講，現價買入風險唔算高，但當然上升水位亦係有限，要睇埋A股表現。不過，呢排揀股適宜以穩陣為上，如果可以上番招股價23蚊都有一成利潤，跌穿上次低位就止蝕。

戰報

東方表行（00398）

股博士於六月九日推介嘅東方表行尋日高見5.4元，以當日低位4.7元計，最多可賺近15%。

順龍控股（00361）

古晨六月九日吼中隻順龍控股當日低位只係0.5元，尋日搶高至0.76元，累計升幅達52%！

古勝