證監會前行政總裁韋奕禮已經退任返咗老家英國，但佢嘅繼任人仲未公布，之前市傳話證監會新CEO人選會喺本月揭盅，唔經唔覺依家已近月尾，睇嚟都係煲冇米粥，絲絲就收到風，話本月應該公布唔到個名喎。
絲絲知道其實人選已經定咗，但原來仲要等特首及財爺拍板先至公布得喎。啋！唔怪之得啦，特首依家正疲於應付復建居屋問題，財爺就忙於搞派錢，真係冇時間扑錘。消息人士同絲絲講，話相信喺第三季應該可以揭盅，即係喺九月前，但斷估港府唔會真係拖到九月啩？
之前市傳證監會新CEO係來自海外監管機構，但絲絲聽到另一版本，話新CEO都會係外國人，佢本身係專業人士，但就唔係來自監管機構，而係來自「業界」，至於係乜嘢「業界」及國籍，絲絲就應承咗唔講得住，總之佢係一個有名望以及已退咗休嘅高人啦！
佘絲韻