新世界發展（00017）主席鄭裕彤嘅孫女鄭志雯（Sonia）坐正新世界酒店集團主席個位冇耐，就拿拿臨落實佢之前所講嘅大計，收購總部設喺美國德克薩斯州達拉斯嘅Rosewood Hotels & Resorts,L.L.C.，作價2.295億美元（約17.9億港元），呢個銀碼與佢心目中要喺未來5年投放11億美元（約86億港元）擴大版圖嘅目標仍有一段距離，反映仲有好大嘅發展空間。
Sonia就大讚Rosewood Hotels & Resorts係全球最著名及奢華嘅酒店集團之一，喺8個國家管理共19所物業，旗下仲有富傳奇色彩嘅酒店及度假村，新世界酒店買埋Rosewood之後，肯定令佢哋喺豪華酒店管理業界之外，再提升國際地位及名聲。
今年只有30歲嘅Sonia係鄭家純嘅千金、鄭志剛嘅細妹，畢業於美國哈佛大學，曾經喺一間國際投資銀行及美資私募基金負責地產業務，○八年底回歸家族生意，負責集團嘅酒店業務，○九年出任新世界酒店集團首席總監，約喺半年前坐正做主席。佢喺年初時立下目標，要喺未來5年投放11億美元擴大版圖，由目前管理及發展中嘅超過20家酒店數目，增至逾40家，Sonia咁有魄力，應該難佢唔倒。
余絲韻