本港金融界原來有不少浙江幫猛人，金銀業貿易場前理事長李德麟係其中一人，佢近日更當選新一屆香港浙江省同鄉聯合會會長，就職典禮將喺本月二十七日舉行。
李德麟嘅家鄉喺浙江寧波，佢本身係浙江省政協常委，父親係李和聲，佢嘅家族多年來經常做善事，好支持家鄉嘅發展，今次李德麟喺芸芸嘅同鄉猛人中，當選浙江省同鄉聯合會會長，都算實至名歸。
據一名金融界前輩同絲絲講，本港嘅浙江幫猛人真係好多，仲要係粒粒巨星，數數手指，包括有陳廷驊、查懋聲、邵逸夫、胡鴻烈、曹光彪及已故嘅包玉剛等，真係為浙江人爭光。
講番李德麟，佢做事一向好上心，記得佢做金貿場理事長時，倡議大力改革貿易場，雖然有啲保守派可能會對改革步伐有保留，但佢仍堅持自己想法，大搞電子交易平台及從業員發牌制度，希望貿易場納入監管。
依家金貿場改革已有一定成績，電子交易平台交投唔錯，並籌備推出人民幣公斤條產品，最重要係金貿場牌價翻咗幾番，已升到幾百萬元，李德麟應該非常安慰。
余絲韻