曼聯將來港上市，認真犀利。曼聯上市，最開心梗係佢班粉絲。有機會做佢哋嘅股東，一個咁好彩，有機喺球場出席股東大會，一見偶像風采，簡直係充滿幻想。
講真，如果曼聯上市，估值約17億英鎊，差唔多係全球估值最高嘅球隊。同○五年比足足高出一倍，啱價啱市，加上呢期大家都喜歡國際品牌來香港上市，然後回歸本土，真係好似偶像「城城」出道嘅策略一樣，對曼聯愛愛愛不完。
再睇真少少，曼聯上市全因當日以蛇吞象形式買入，大部分以對沖基金嘅高息貸款，更以球會資產作抵押，搞到曼聯周身債，債台高築，唔集資還債，唔搞搞佢，點算好？
大家要記住，買一個品牌即係買緊佢嘅溢價，但溢價好多都能夠「標準化」，即係佢嘅商譽可以為產品嘅質素進行標準化，例如可口可樂係一個有價值嘅品牌，佢嘅可樂喺邊處製造都有一定程度上嘅保證，但係買曼聯，買嘅係佢地隊波，領隊又話要退休，鋼門又掛靴，咁鬼多要員風險集於一身，都咪話唔大鑊。
諗諗下，都係做粉絲好過做股東，全因變心容易。好過做咗股東後，情難捨就仲大鑊。
香港大學電子金融服務榮譽助理教授 徐燦傑