絲絲講場：萬事達卡孫奕朗：朱古力原來咁惡整
平時去傳媒發布會，多數都係大家坐定定，食吓飯講吓業務，絲絲尋日去咗一個別開新面嘅傳媒聚會，話說萬事達卡國際組織香港及澳門總經理孫奕朗（Jeroen van Son）約咗一班傳媒聚吓，去灣仔一間專食朱古力嘅舖頭，一齊落手落腳整朱古力。
Jeroen話今次係第一次整朱古力，喺師傅教大家製作步驟時，佢仲笑話都幾易整喎，點知到落手嗰陣，佢就話原來真係幾難，尤其係控制朱古力嘅厚薄，若然慢啲手，啲朱古力就即刻變硬，整唔到好靚嘅外形喇。
Jeroen本身係荷蘭人，來港之前喺澳洲最大嘅信用卡發卡銀行工作，之後轉投萬事達卡，仲一家大細搬嚟香港住。佢話香港嘅生活方式好快、好進取，係一個體驗亞洲嘅好地方，唔知對佢發展內地業務有冇幫助呢？
余絲韻