今個星期日就係父親節，滙豐保險香港董事總經理梁偉邦（Robert）尋日率先收到父親節禮物──愛女親手繪製嘅瓷磚擺設，Robert朝早收到之後就已經愛不釋手，仲帶埋份禮物畀絲絲睇，實行分享佢嘅喜悅，睇嚟佢真係好滿意呢份禮物。
絲絲知道滙豐針對市民嘅退休計劃做咗個全球調查，Robert話原來香港只有46%嘅勞動人口有為退休訂定財務計劃，呢個比率係全亞洲最低。唔好以為發達國家嘅比率一定好高，好似英國就只有40%，美國更只有36%，較中國及印度嘅78%低得多。據估計係因為由政府提供退休福利嘅地區，呢個比率會較要純由個人負擔嘅地區為高。
Robert仲話，估計至二○五○年，香港65歲以上人口將佔32.6%，會令在職人士包括佢哋子女嘅負擔變得更沉重，所以退休計劃嘅問題好值得重視。
余絲韻