市場熱線：市況未明暫宜觀望

凡事唔可以睇死，或者希臘突然有救？或美國突然推QE3？或月尾芬佬為半年結粉飾窗櫥？抱住呢個信念嘅可以望天打卦，五月尾都無端端可以連升6日，但當時sell in May太過露骨，所以大戶突施回馬槍震走班淡友先，到你戒心鬆懈時至動殺機。

古勝一早定22,500點為界線，跌穿兩日上唔番，一見勢色唔對就要走鬼。呢類關鍵支持位一穿就萬劫不復，有分析話下個支持位係21,500點，但古勝認為未免太過樂觀，前五個月玩上落市玩咗咁耐，一踩單邊點會咁快收手。

中美魚缸危危乎

尋日恒指上晝仲頂得住兩萬二，但下晝就無力再頂。唔單止港股穿底，美股同A股亦同聲一哭，道指再穿萬二關口，通脹亦開始殺埋身，好快就到加息兩難時。滬綜指亦守唔住2,700點關口，創咗6個月新低。美股算跌得少，A股更令人擔心，金融圈嚴重旱災，拆息飆升，民企冇錢借，中小企執笠，連大鱷都話沽空人仔。

尋日有消息話在港中資券商建議搞「專項QDII」，即係小型「港股直通車」，如果成事，港股可望沖喜，但都唔好期望過高，依家明顯係有資金流走，港紙跌到7.7967，幾乎乜股都死，防守力強嘅股係時候上場，好似煤氣（00003）、中移（00941）、粵投（00270）呢類公用股，收息股領匯（00823）升2.27%創新高，雨潤（01068）乘住豬肉價高亦係奇葩，但奇在中石油（00857）都可逆市上升，油價隔晚大跌4%，但中海油（00883）亦僅跌0.65%。

莎莎（00178）中午派成績表都幾靚仔，但下晝亦要被殺低5.55%，反而東方表行（00398）業績後升咗6.7%，新PE唔夠10倍，係僅次於謝瑞麟（00417）嘅最平零售股。祖國有消息話減奢侈品進口稅，橫掂大款去外國掃貨，不如肥水不流別人田。講奢侈品自然想起「趴打」（01913），好揀唔揀呢個時候上市，結果冇人吼之下要減價。

一太表現算硬淨

呢排好多公司趁價低回購股份，而第一太平（00142）自從舊年開始已密密回購，無論個市升跌都咁硬淨，而公司業務集中喺菲律賓同埋印尼，印多福、菲國基建同礦產盈利大幅增長，淨係PLDT不進反退，呢排菲律賓同中國為個海有爭議，但相信唔會有大鑊嘢。

一太連續兩年搞分拆，遲吓會將印尼做種植嘅附屬公司分拆上市，股東會有實物分拆，但散戶可能得物無所用，雞碎咁多兼唔知點沽。

戰報

雨潤食品（01068）+10%

小尾本月二日推介嘅雨潤，尋日最高升上28.6元，以當日低位25.95元計，累計已賺逾一成。

水務地產（02349）+9%

帥哥周二睇中隻水務地產，當日低位只係0.099元，尋日高位見0.108元，短炒都可賺超過9%。

古勝