呢排有好多「殃及池魚」嘅個案，美國多家中資企業因帳目問題被除牌，凡係牌頭有「中」字或「Sino」字眼，都畀投資者戴有色眼鏡對待而沽到殘，評級機構標普喺前日話搵唔到玖龍紙業（02689）嘅管理層，即累及其他紙業股捱沽。理文造紙（02314）CEO李文俊（Raymond）尋日就話，大家隨時可以搵到佢，嘩！絲絲聽落去感覺有啲語帶雙關喎！
Raymond又話唔會理人哋嘅嘢，自己做好自己就得喇，為咗「穩陣」起見，佢強調話大家隨時都搵到佢。其實Raymond都有佢嘅道理，事關佢話依家公司冇發債，又冇發票據，只係得啲銀行貸款，一年到期嘅都係得四分之一，所以唔使評級機構幫手評級，自然口氣都可以大啲啦！
佢仲同絲絲講，話佢依家仲後生，因此所有事情都會睇長線啲。
余絲韻