市場熱線：康師傅增長勢頭勁
港股連續3日玩單日轉向，尋日係先升後跌，隔晚美股借啲細微細眼嘅經濟數據反彈相當牽強，恒指朝早最多升百點，好快就倒跌，最後跌152點；現貨收市後，「蠱惑的期指」繼續插，低水逾百點。古勝雖然覺得港股早兩日反彈不成氣候，但亦估唔到咁快就彈完，雖然恒指距離22,500點呢個關鍵位只係百幾點，未來兩日仍有機會收復失地，但如果到周五都未能上番22,500嘅話，古勝會進一步清倉。
尋日下跌主要係話上海同業拆息抽高，滬綜指跌24點又返到2,700點邊，而港紙亦不經不覺跌到落7.785，孖屐明顯係有缺水症。藍籌升得最多係「兩電」（00002及00006），國企係青啤（00168），紅籌係在下尋日推介嘅中化肥（00297），呢排都係穩陣股秤先。
零售股需作重估
玖紙（02689）下晝復牌，反彈14%，並一怒之下炒咗標普魷魚，雖然評級機構屬於中立，但咁樣對個老細又值得商榷，搵唔到管理層就撤銷人哋個評級，喺香港屬於史無前例，最悲慘係前日下晝唔知乜事跟沽嘅股民，喊都喊唔番。景福（00280）竟然發盈警，原因係話租金太貴，香港舖租貴係人都知，但估唔到賣金嘅都覺得難頂，如果賣衫豈不是仲慘？所以零售股嘅投資價值要有重估必要，但六福（00590）尋日逆市升5%可算奇葩。
紡織股尋日表現唔錯，德永佳（00321）升6.3%，主要係炒紡織業「十二五」規劃快出爐，古勝推介互太紡織（01382）時亦分析過，好多中小型廠都頂唔順棉花價格大幅波動、人工狂加同借錢困難三重打擊，所以大廠就會更加坐大。自從上個禮拜阿爺話要減輕路費幫物流業減輕負擔後，尋日宣布向公路開刀，江蘇寧滬（00177）即插6%。
銀基（00886）派完成績表後，前日先升後跌，但尋日回升6.4%再創上市新高，原因係管理層話四月加完價17%之後，遲吓可能再加。祖國消費品好多想加都冇得加，但白酒可以加咁多真係羨煞旁人，不過，阿爺其實亦有微言，雖然話貴價白酒唔係普羅大眾必需品，但始終驚畀人話大細超。
祖國驗出有4款即食麵含有塑化劑，要即刻喺超市下架，出事嘅包括農心、日清、御品皇等著名品牌。講到即食麵，不能不提康師傅（00322），雄霸咗祖國孖屐咁多年，而且市佔率仲愈來愈高，近年將品牌推廣到多種飲品方面亦取得成功，古勝都要寫個服字。
飲料成發展重點
前排康師傅想再加價，點知阿爺出面勸喻，其股價最低見18蚊，惟轉頭將產品縮水，變相達到加價目的，公布完首季成績表後最高上到近24蚊，尋日逆市升到23蚊，仍相當硬淨。康師傅往績PE高達35倍，講到估值之高真係數一數二，預測PE近30倍，但孖屐對佢增長前景仍好有信心。不過即食麵嘅增長空間已經有限，未來發展會放喺飲品方面，茶同果汁飲品首季營業額分別增長68%同31%，靠個品牌優勢已經打跛腳唔使憂。
戰報
中軟國際（00354）+14%
古晨尋日推介中軟果然有料到，於開市低位2.35元上車，即日炒高至2.69元，食胡已賺逾14%。
銀基集團（00886）+12%
銀基尋日高位見過8.16元，帥哥於本月一日睇中時低位只係7.29元，累計已賺近12%。
古勝