絲絲講場：華懋新地分獲殊榮
尋日政府拍賣靚地，全港大大小小嘅發展商都去晒灣仔伊館博弈，而喺另一邊廂嘅頒獎場合就和諧得多，絲絲講緊嘅係華懋集團及新鴻基地產（00016）分別攞咗兩個好特別嘅獎項。
The Lily奪五星級大獎
華懋旗下嘅淺水灣服務式住宅The Lily最近榮獲International Property Awards亞太區High-Rise Architecture五星級大獎，係香港首個攞到呢個獎嘅住宅項目。好多人都知，The Lily係龔如心生前嘅得意之作，佢當年以天價55.3億元買咗淺水灣呢幅地皮，喺英國搵咗建築大師Norman Foster設計The Lily，而淺水灣亦係龔如心及王德輝喺一九五五年結婚度蜜月嘅地方。
至於係頒獎場合常客嘅新地，由執董陳國威代表攞過嘅獎真係好多，最近新地就獲《Euromoney》頒發「香港最佳企業管治公司」獎項，係連續5年奪得呢項殊榮。《Euromoney》嘅「亞洲最佳公司」選舉邀請亞洲區內各大銀行及研究機構嘅市場分析員，根據企業嘅市場優勢、盈利能力、增長潛力、管理質素等表現進行評審，選出佢哋心目中嘅最佳公司。新地嘅整體表現獲高度評價，除咗榮獲「香港最佳企業管治」獎項外，更分別奪得亞洲地產界別及香港區嘅「最可信和一致的業務策略」首名。
余絲韻