絲絲講場：幻音籲支持港產手機
幻音數碼（01822）尋日轉主板，主席廖家俊（Jack）講吓公司發展大計，仲介紹自行開發嘅Android手機，佢話公司上市編號係18、22，即係希望可以好似18、22歲嘅後生咁年輕，轉板係公司短期目標，依家最大心願就係每個香港人都會有「Made in HK」嘅手機。
自行研發付運海外
幻音數碼係首家成功推出Android產品嘅港企，仲攞過創新科技產品大獎，阿Jack話，公司自行研發嘅智能手機已經開始付運到意大利，今年手機付運目標達10萬部，「Made in HK」嘅手機喺香港當然有得買，佢叫大家支持吓本地貨，希望每個港人都有一部港產手機。
佢哋今年會推出第二個招牌產品——心跳監測器，阿Jack話用咗兩年幾時間研發，最特別係用耳機設內置紅外線，可以喺運動時按一下量度心跳。佢話原本以為呢個設計唔可行，但最後都成功咗，仲接到美國定單，會喺第三季推出，最令佢開心係呢個產品嘅盒會印上「此技術來自香港」，係前無古人嘅做法，所以特別自豪。
余絲韻