絲絲講場：四叔噏冧巴 唔係畀貼士
恒地（00012）主席李兆基（四叔）已經有一段時間冇講股票，佢之前話怕「言多必失」，所以少講為妙。不過佢尋日心情好，就乜都講吓，唔知係咪因為佢嘅新抱徐子淇就快生得（據聞預產期係七月），好快就湊夠半打孫仔孫女，心情靚靚，仲送咗幾個靚「冧巴」畀大家！
不過大家唔使羨慕絲絲，四叔講嘅「冧巴」唔係股票「冧巴」，其實係恒基系3家公司召開股東會嘅日期！
提醒開股東會日期
四叔話，「一號係美麗華（00071）開會，三號係煤氣（00003）開會，九號係恒地開會，恒地嘅嘢、股票就留番恒地開會時問，煤氣嘅嘢就留番煤氣開會時問，今日就講酒店啦！」絲絲想知個市點睇喎，點等到九號至問呀，所以都唔理四叔講嘅「冧巴」，一於硬着頭皮問佢點睇恒指走勢，果然由於四叔心情大靚，似足黃大仙咁有求必應。
余絲韻