絲絲講場：韓克強教仔理財冇手鬆
理財呢門學問，你可以話高深，亦可以話簡淺，不過大部分專家都認為應該從小學習。滙豐香港區零售銀行及財富管理業務部零售網絡主管韓克強亦係自小訓練有素，依家為人父母，當然亦好嚴格咁要求囝囝學習理財之道。
囝囝攞零用要遞Form
話說韓克強小時候嘅零用錢係「日薪制」，父母會每日發放，不過啲錢只係僅夠搭車及食午飯，所以要儲錢都幾困難，佢惟有日日行路返學放學，先可以逐少咁儲一筆錢。
佢覺得依家啲學生哥可以有好多方法儲錢，因為唔少家長會每月或每周畀零用錢，子女就可以較靈活咁分配日常開支。
韓克強細個時儲錢原來係咁辛苦，咁佢對自己嘅小朋友又會唔會鬆手啲呢？佢笑言自己係嚴父，成日教囝囝要有計劃及目標，所以囝囝喺細個嘅時候，已經要交計劃書「申請」零用錢。
韓克強嘅囝囝自小接受訓練，相信理財技巧已盡得阿爸嘅真傳啦。
向學生傳授理財錦囊
既然咁有理財心得就梗係要一齊分享，佢喺上周就向250名中學生傳授理財知識，好多同學仔聽完佢點樣教仔後，即時嘩嘩聲，好似好不可思議咁，其實絲絲以前都係攤大手板問阿爸阿媽攞零用錢。
除咗分享經驗，韓克強當日仲與3位同事演出話劇，向中學生、大學生及大學畢業生教授理財心得。其實佢嘅理財錦囊簡單易行，就係先儲蓄、後消費，消費嘅時候亦要量入為出及用得其所。
余絲韻