內地三大電訊商高層地震嘅傳聞被熱炒，最新嘅版本甚至傳出中電信（00728）董事長王曉初將調任雲南省省長，中電信新聞發言人尋日就主動闢謠，直斥消息不實！
有關王曉初將調任雲南省省長嘅消息，係中國移動互聯網產業聯盟秘書長李易喺微博度爆出嚟，消息一出，內地網站就爭相轉載。中電信新聞發言人郭浩喺尋日早上主動澄清，話微博上流傳有關中電信領導將轉任省長嘅消息不實，更直斥謠言已對中電信嘅正常工作、發展及穩定帶來不利影響。咁高調否認王曉初轉職嘅傳聞，的確令人感到意外。
講開又講，上月亦曾有傳中石油（00857）董事長蔣潔敏將出任雲南省省長，傳聞歸傳聞，消息至今未獲證實。不過內地電訊商管理層將「大執位」嘅消息絕非空穴來風，事關中移（00941）董事長王建宙已屆退休之齡係公開秘密，加上國企管理層每隔一段時間都會出現音樂椅式嘅「大執位」，三大電訊商短期內出現管理層變動嘅機會絕不能排除。
（余絲韻）