環球貿易嘅牙骹戰一向劇力萬鈞，做皮製梳化生意嘅敏華（01999），佢哋嘅主席黃敏利對呢方面都有深入研究，佢尋日煞有介事咁同絲絲講，話今年四月歐盟暫休一戰，正式取消對中國皮鞋徵收16.5%嘅高額反傾銷稅，令人均買鞋數量由5對增加到6至6.5對，皮鞋零售價料減30%。黃主席一副皮鞋專家嘅口脗，搞到絲絲差啲以為敏華會「撈過界」。
原來黃主席係想話，以一套「3+2+1」嘅6座位皮製梳化計，要用5隻牛嘅皮先至做到，而製造3座位梳化亦最少要用1至1.5隻牛嘅皮，依家皮革價格升到佢入行20年以嚟嘅高位，每平方呎要成1.5至2美元，尤其係去年十二月起至今年五月，升幅更達雙位數，尋根究柢就係因為皮鞋搶高晒啲皮價。
黃主席繼續同絲絲呻，佢話依家啲鞋商唔單止抬高個價，最可惡係搶貨源。皮鞋一向佔咗約50%嘅皮革分布比例，梳化及汽車只係分佔約20%及15%，依家皮鞋需求大，佔比多咗5%至6%，因此黃主席預料近期皮製梳化嘅銷售比例會下降，不過「塞翁失馬焉知非福」，皆因布製梳化嘅毛利率原來仲好過皮製梳化。
（余絲韻）