恒生銀行（00011）宣布董事會有新臉孔加入，佢哋委任高盛大中華地區前主席胡祖六做獨立非執行董事，任期3年，每年董事袍金有34萬元，胡祖六加入後，恒生嘅獨立非執董人數增至9人。大家都知胡祖六有「具西方背景嘅中國經濟學家」美譽，近年恒生中國搞得有聲有色，相信胡祖六可以為董事會提供不少寶貴意見。
其實胡祖六喺離開高盛後一直都唔寂寞，佢除咗成立私募基金春華資本之外，絲絲數過佢依家擔任嘅主要職務，真係十隻手指都數唔晒，早前更有傳佢係人民銀行副行長嘅候選人之一添。
除咗有非執董上任，恒生尋日亦公布去年「業績」，佢哋早已出咗去年嘅年報，尋日發布嘅係企業責任報告，主要回顧去年喺經濟、社會及環保方面嘅表現。恒生去年盈利增長13%，而恒生義工服務時數就「跑贏」盈利，按年增17%，員工人均溫室氣體釋放量則下降3.8%。照咁睇，恒生去年嘅表現的確好亮麗。
（余絲韻）