證監會行政總裁韋奕禮喺下周三就會離任，呢兩個星期差不多日日都有佢嘅歡送會，佢真係好鬼忙碌，被證監會監管嘅港交所（00388），佢哋就分「上、下集」歡送韋奕禮。
先講「下集」，話說尋日港交所主席夏佳理及一眾董事，就喺港交所交易大堂搞咗個酒會歡送韋奕禮，但呢個係私人聚會，絲絲無緣參與，不過聽聞場面好熱鬧，有近100人出席，除咗唔少經紀到場，就連財經事務及庫務局常務秘書區璟智亦有出席呢個畀面派對。
由於韋奕禮好鍾意打高爾夫球，夏佳理就代表港交所送咗兩支高爾夫球棒畀佢留為紀念。不過韋奕禮返到英國後，好快就要投入新工作，未知佢到時仲有冇時間打Golf呢？
港交所都算有心思，知道韋奕禮鍾意打Golf，除咗尋日嘅酒會外，原來喺早一、兩個星期前已有「上集」，港交所董事局喺粉嶺高爾夫球會設晚宴歡送韋奕禮，當晚人少少，只有一圍枱，夏佳理及行政總裁李小加當然亦係座上客。
點解要去到粉嶺高爾夫球會咁遠？原來係貪嗰度遠離市區，又較有風味，唔似平日喺酒樓餐廳咁普通喎。
（余絲韻）