絲絲講場：鄭大班退休遺憾
尋日名副其實係「鄭大班的最後一夜」！服務滙豐33載嘅滙控（00005）執行董事鄭海泉（Vincent）尋日Last Day，但要離開真係有啲難捨之情。Vincent尋日引用《Hotel California》歌詞以表心迹。「You can check out anytime，but you can never leave」，即係話雖然你可以隨時退房，但卻永遠離不開，莫非Vincent想話佢人雖然離開滙豐，但個心永遠喺度？
Vincent收息好和味
Vincent雖然話退休啫，但會繼續做滙豐銀行嘅亞洲事務顧問，繼續發揮佢嘅專業意見。講到最難忘嘅，Vincent話除咗入錯大班Lift，仲有一次去越南，同越南央行副行長撞番，有啲感慨咁話喺滙豐真係識咗好多好朋友。
Vincent對於滙控嘅股價持續低迷，佢話自己都覺得有啲唔好意思，但股價係市場決定，依家環球金融規管方面有咁多不明朗因素，言下之意，股價低真係在所難免。但佢話滙豐啲股息都唔錯啊，好過擺喺存款喎！佢仲形容自己係一個小股東，之後都靠佢收股息。睇番去年嗰份年報，Vincent持有滙控嘅股份，都幾「和味」架！
余絲韻