國泰（00293）早前有好多人事變動，大部分已陸續履新，今次登場嘅係常務總裁朱國樑，尋日喺股東會後，好多人圍住佢問東問西，可惜佢有會要開趕住走。但大家唔使失望，佢喺公司刊物《國泰天地》內講咗好多平時唔會喺公開場合講嘅嘢，都幾溫情，睇得出佢係一個非常着重家庭嘅好男人。
朱國樑除咗熱愛工作，亦十分重視家庭生活，佢閒時會睇吓書、品吓酒，逢周末都會陪父親行山遠足，有時間仲會與囝囝一齊睇波添。
佢喺國泰已任職26年，喺三月底接替現任CEO史樂山做董事及常務總裁，亦係繼陳南祿後，另一位進身國泰董事及高級管理層嘅華人。
佢依家身兼國泰常務董事及航空服務董事兩職，本月底公司會公布新一輪管理層職位調動，唔知到時會唔會搵人分擔吓佢嘅工作呢？佢過往曾派駐其他地區長達13年，當中包括曼谷、北京、台灣及悉尼呢啲咁有魅力嘅城市，佢喺呢啲地方識咗好多好朋友，所以每次返去都有回家嘅感覺。
佘絲韻