絲絲講場：夏佳理都有幫襯米蘭站
「超購王」米蘭站 （01150）招股令全城瘋狂，有逾9萬人申請認購，估唔到連港交所（00388）主席夏佳理都係米蘭站嘅「擁躉」！點解咁講呢？皆因夏佳理都曾經幫襯米蘭站，買手袋送畀老婆大人。
老婆心頭好呢度買到
夏佳理貴為「有米之人」，使乜去買二手手袋？查實佢係去買新手袋至真，佢笑笑口話，每逢過時過節都會送禮物畀老婆，聖誕節及新年就更加唔少得，但有時有啲款式，專門店可能賣晒，未必買到，佢就曾經喺米蘭站買到太太嘅心頭好。絲絲聽落真係好Sweet呢！
聞說米蘭站都有唔少限量版名袋賣，唔知夏佳理係咪喺米蘭站買咗個限量版名袋畀太太呢？
絲絲知道米蘭站做生意手法非常靈活，除咗有全新或二手袋賣之外，仲分為有盒或冇盒（包裝）出售，有盒就梗係貴啲啦，佢哋嘅生意頭腦真係靈活到你唔信。
或抽空出席上市儀式
夏佳理話，今次米蘭站能夠擊敗一眾中外大型新股，打破本港新股認購紀錄，成為新一代「超購王」，既然佢哋咁威，如果時間許可嘅話，佢都會出席米蘭站下周一嘅上市儀式。
夏主席唔係每隻新股都會抽空出席上市儀式o架，如果佢到時畀面出席，肯定錦上添花，米蘭站主席姚君達必定好開心！
(余絲韻)