一年一度嘅「股神」巴菲特慈善午餐拍賣又嚟喇，一如以往喺eBay進行競投，由紐約時間六月五日晚上10時半開始，至六月十日晚上10時半結束，想與「股神」共進午餐嘅「粉絲」就要準備好「彈藥」喇。
呢項慈善活動已舉行至第12屆，收益撥捐專為窮人提供職業訓練及醫療服務嘅美國慈善機構格萊德基金會（Glide Foundation），中標者可帶同7名同伴與巴菲特共進午餐，地點係曼哈頓扒房Smith & Wollensky。慈善午餐拍賣底價2.5萬美元，去年由「神秘人」以破紀錄嘅262.6萬美元投得，較○○年首屆嘅2.5萬美元升逾百倍。
使咁多錢與「股神」鋸扒，抵唔抵真係見仁見智，但○八年以211萬美元投得嘅中國「赤子之心」基金經理趙丹陽應該會話超值，皆因佢其後披露向「股神」推薦咗自己一早持有嘅物美（08277），刺激呢隻股勁升令佢帳面勁賺。「股神」去年就講明午餐時不談股票，只談慈善，但面對歐債危機及美國可能「收水」等重大投資環境變化，相信中標者都好難「忍口」。
另方面，巴菲特將跳入公仔箱，客串本月十九日播出嘅NBC喜劇《The Office》本季最後一集，「粉絲」萬勿錯過。
佘絲韻