市場熱線:三一可坐順風車

隔晚道指由升轉跌,尋日港股全日最叻係9點40至9點50嗰10分鐘,挾上最多200點,跟住轉趨牛皮,3點後又倒跌,而且已係5連跌,唔通真係Sell in May?恒指收市跌87點報23,633點,期指繼續低水239點,成交唔夠700億元。雖然恒指5日平均每日只係跌100點,但咁樣陰乾唔係辦法,而且有托住三兩隻大藍籌沽其他股嘅味道,國企指數日日都跌得多過恒指。

最明顯單日轉向嘅係恐慌指數,拉登死至令人恐慌。祖國「五一」冇加息,滬綜指連續第二日反彈,但港股尋日依然彈唔起,如果美股開始回吐嘅話,港股更加冇運行,五月始終小心審慎為上。

油股家陣夠值博

商品價格回落令到資源股捱沽,金價升時、金股唔升已經唔對路,依家連股神都話要沽金,金股跌多兩錢重,瑞金(00246)差唔多創52周新低咁滯。要博都博油股好過,皆因拉登死後,中東個火藥庫危危乎,有乜依郁油價隨時有機會挑戰高位。

逆市奇葩當然係隻唐宮(01181),街貨得100球好易歸邊,尋日成交已有53球,借住小肥羊(00968)畀鬼佬生吞單消息,乘機發圍唔出奇。另一異動板塊係半導體股,古勝喺中芯(00981)獲中投入股時已分析過,祖國要自己發展芯片技術,憑呢個概念可以做強,但估唔到過咗幾日至發力。

至於細價股呢排氣氛好差,中國置業(00736)狂跌72.5%,皆因1供30嘅供股股份日內出籠,每股供股價只係6.8仙,唔插至奇!中國木業(00269)自從「超人」縮沙之後,再跌18.7%;南亞(00705)開採大馬稀土亦縮沙,股價跌13%。捉棋呢樣嘢有舉手不回,買股票亦係買咗冇得後悔,但公司簽咗「刁」一日未落實、一日都有得縮沙,買股票仲慘過行船跑馬唔止三分險。

受惠祖國換機潮

除咗半導體股之外,工程機械股亦都好強,道指成分股Caterpillar業績靚,香港嘅中聯重科(01157)首季亦賺多1.75倍,三一國際(00631)送紅股聽日就除淨,自不免有番炒作。10送5紅股,即係公司股價升上15蚊,股價就變番10蚊。三一之前已上過最高15.3元,但上個禮拜跟住大市4連跌,趁住送紅股市值細咗三分之一,重遊高位難度唔大。

三一國際唔衰得嘅理由係阿媽三一重工等住來港上市,中聯重科上市後表現有眼睇,所以招股反應肯定爆燈。三一除咗要為阿媽護航之外,「高佬盛」早排出報告,話祖國未來幾年要開採好多煤礦,需投資過千億買機械設備,而舊機換新機亦進入高峰期,所以三一同國際煤機(01683)PE睇落幾貴,但亦貴得有道理。三一重工傳喺今季內上市,即係好事近,三一國際自然亦可以坐番轉順風車,除淨後可睇10.5元,即係除淨前嘅15.8元。

戰報

中芯國際(00981)+22%

古晨上周四嗌大家吼實中芯,尋日搶高至0.79元,跟佢於當日低位0.65元上車,勁賺逾22%。

鐵貨(01029)+15%

詩詩上月二十日推介嘅鐵貨繼續做好,尋日高見2.46元,較推介當日低位2.14元,賺近15%。

古勝

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!