市場熱線：遠東宏信貨源歸邊

加存款準備金率大家已預咗，滬綜指亦微升，恒指早段都表現唔錯，但跟住開始冇力，過多3日就放4日假，相信魚缸會逐步淡靜。錢莊加H按息率之後，地主股變弱，恒地（00012）跌2.24%，大戶沽空恒地同四叔對賭暫時取得甜頭，隻公司輪879更大跌三成，恒地後日除息7毫子，四叔如果想幫恒地集資兼且收埋股息，呢三日就要行使埋手上嘅公司輪。

齊合仍有留意價值

雖然指數成分股比較差，但二三線股仍算強勁，只係驚部分股票會趁高抽水，好似齊合（00976）同味千（00538）兩隻批股後跌逾一成。齊合主要業務係收買爛銅爛鐵，上市時禾稈冚珍珠，結果一路慢慢升，由2元升到7.5元先批股，真係佩服間公司嘅耐性，古勝覺得隻股仍係有得玩，因為「十二五」規定提高再生金屬嘅比重，而齊合往績PE16倍、預測PE12倍並唔算貴。

五礦資源（01208）呢幾日大跌，尋日開波最多再跌9.5%，下晝拉埋閘，孖屐消息話6間大孖沙幫手以每股5.2至5.6元批股。炒高批股聽得多，炒低批股則比較少見，但折讓太多批股唔多好睇，所以被迫要壓低個價，隻股復牌後可見真章。

唐宮（01181）今日上市，暗盤價高兩成，呢隻招股勝在PE夠平，但開市高兩成就變得冇乜吸引力，而飲食股平時冇乜成交，所以短炒要識得落車。隻隻新股嘅幕後人手法都唔同，有啲先高後低，有啲先低後高，合生元（01112）當其他奶股發力嘅時候依然牛皮，但今個月初先來第一棍，營造「小旗」之後，尋日再來第二棍，亦係收夠貨至肯開車嘅表現。

融資租賃大有需求

炒新股最重要4個字係─貨源歸邊，愈多散戶認購嘅新股升幅愈細，就係呢個道理，之前連記者會都冇個、低調招股嘅新股則隨時爆冷，上月尾上市嘅遠東宏信（03360），亦係悶聲發大財嘅例子，尋日股價創新高，收報8.18元，較招股價高三成。公司業務係融資租賃，業務性質好似中學經濟堂都有教，但唔計錢莊股，專做呢項業務嘅上市公司只此一家。

除咗遠東宏信之外，舊年尾上市嘅中國信貸（08207）亦係另類借錢公司，今年祖國係咁加存款準備金率，非國企嘅公司借錢困難，結果呢類融資公司得益唔少，而且機器擁有權屬於租賃一方，唔使驚走數。遠東宏信舊年賺多五成，一○年往績PE約30倍，今年上市後名氣大咗，股東資金多咗，生意亦可以做多咗，但短期淨係貨源歸邊呢個概念，短炒應該仍然有力再上。

戰報

匯銀家電（01280）+22%

古晨上周二推介嘅匯銀家電抖完氣再上，尋日高見1.93元，較推介日低位1.58元，賺逾22%。

英皇國際（00163）+15%

詩詩上周一睇中英皇國際，當日低位只係1.62元，尋日一度升抵1.87元，高位食胡可賺逾15%。

古勝