本港首隻人民幣新股匯賢產業信託（87001）正進行招股，好多股民對呢樣新嘗試都好感興趣，絲絲見匯賢個Logo有個「京」字，又紅當當，都好想知背後有冇古仔。
老友分析話，其實呢個商標設計包含好多嘢，商標以中國古金錢為造型，既代表中國現行貨幣──人民幣，亦係財富嘅象徵；古錢內嘅「京」字，代表中國首都北京，亦即東方廣場嘅所在地；同時以東方廣場商標中嘅四格圖案，代替咗「京」字中央嘅「口」字，凸顯東方廣場位處北京市中心嘅地位；原屬東方廣場商標嘅四個方格，分別代表東方廣場嘅四個組成部分，包括東方新天地商場、東方經貿城辦公大樓、東方豪庭公寓及北京東方君悅大酒店。
至於商標選用紅色及金色，好明顯係代表繁榮、財富及喜慶嘅意義。
余絲韻