蘋果公司喺一年前推出iPad，隨即引來三星電子及HTC等電子巨擘「跟風」，希望喺高速增長嘅平板電腦市場上分一杯羹，但研究機構Gartner預期，蘋果公司嘅設計及一系列嘅應用軟件將繼續吸引消費者，無論係第一代抑或第二代iPad，最少喺未來4年仍可保持領導地位，二○一五年嘅市佔率先至會由今年嘅69%降至47%，而利用Google旗下Android平台嘅平板電腦，二○一五年嘅市佔率會由今年嘅20%升至39%。
另外，亞馬遜會喺下月發售結合廣告功能嘅新版本Kindle電子書閱讀器，新Kindle透過廣告收入補貼機價，令售價低至114美元（約889港元），較冇廣告版本平18%。
（余絲韻）