國泰（00293）前行政總裁湯彥麟（Tony）喺上月底正式離職，過檔國際航空運輸協會（IATA）做CEO，大家以後要見佢就要去瑞士。Tony離職前去咗西雅圖接收波音飛機，一班老友順便搞咗個「湯彥麟惜別之旅」，而呢次接收飛機之旅嘅機艙服務經理，原來與Tony好有淵源！
話說Tony當年喺馬尼拉做助理經理，負責面試空姐，有次喺泳池主持游水測試，有位面試者叫Vickie，佢被人救咗上岸兩次，先承認自己唔識游水。由於當年規定空姐必須通過民航處規定嘅游水測試，Tony都幫佢唔到，點知一返到Office就收到電話，話民航處剛取消咗呢個要求。Vickie喺國泰一做就30年，佢就係今次惜別之旅嘅機艙服務經理！
（余絲韻）