金管局前總裁任志剛一直對人民幣國際化有好多想法，由離任至今起碼寫咗十幾篇相關文章或演辭，佢喺上周又有新作，寫都未夠，下月二十四日會喺中大開壇，再講中國貨幣及匯率政策。據老友話，一日內已有半百人士報名上堂，非常踴躍。
絲絲都第一時間上網報咗名，只係畀「一舊水」就有世界銀行家級數嘅任總同你補習，抵到爛啦！
大家記唔記得中大喺去年公布咗，中大全球經濟及金融研究所會舉行全球金融菁英領導研討班，專畀金融及監管機構等高層主管參加，主講嘅包括任總、中投香港董事長劉遵義以及幾位諾貝爾經濟學得獎者，不過呢個課程學費認真昂貴，短短21堂嘅5日半課程索價8萬蚊，兼且唔係有錢就讀得，要揀過至有資格。咁你話今次任總講Talk只係收「一舊水」，係咪明益街坊？
（余絲韻）