市場熱線：鞍鋼低位儲定貨

恒指下晝曾收復兩萬四關，但收市仍守唔住，報23,976點，日本、南韓同台灣魚缸都跌得多過香港，全世界通跌，A股算最硬淨，滬綜指微跌1點。孖屐冇乜好炒，竟然炒到祖國電力股，而飛機股則因為啱啱公布咗民航業「十二五」規劃而順勢炒起，其實個規劃對飛機着墨唔多，較為集中喺機場方面，特別會喺中西部起好多個新機場。

浪潮整固後或再上

中電信（00728）傳同「哎瘋」傾唔掂，慘跌5.2%。跌得多嘅亦離唔開油股，傳「狂人」會扯白旗，中石油（00857）同中海油（00883）分別跌4.86%同2.89%，中海油服（02883）更跌5.7%，前日重新招股嘅海隆（01623）可算招不逢時。奧亮（00547）轉做「廣西有色」，復牌先升到0.465元，跌到0.265元收市，呢支陰燭夠晒陰。

古勝上個禮拜話浪潮（00596）升到0.64元之後會有第一重阻力，結果隻股升到最高0.66元之後即見蟹貨出籠，尋日再跌到0.59元。不過，祖國依家炒緊雲計算概念股，浪潮完成整固之後或者有力再升。另一隻軟件股中軟（00354）亦明顯係整固當中，唔怕悶嘅可以吸納。

日本重建冇錢、冇地、冇建材，你話點算？但有部印鈔機始終可頂住先，將來點收科係將來嘅事。尋日建材股普遍都有得炒重建概念，鐵貨（01029）升11%，海螺（00914）、中建材（03323）同山水水泥（00691）三大水泥股都先跌後升，鋼鐵股波動最大，早段先隨大市下跌，跟住鋼鐵A股升到哄哄聲，H股亦轉跌為升，但臨尾隊番轉頭，鞍鋼（00347）同首長國際（00697）微跌，馬鋼（00323）同重鋼（01053）則微升。

鋼材出口需求旺盛

尋日開市前話阿爺可能取消部分鋼材嘅出口退稅，本來係不利嘅消息，但中金唱好鋼鐵股，原因係三月出口數據大幅增長，而日本限電同焦煤價貴，所以估計鋼鐵行業出口超過預期嘅現象會持續到第三季，而內地庫存繼續下降，顯示旺季需求正逐步釋放。

馬鋼同重鋼A股差啲漲停板，鞍鋼A股最多亦升6.7%，但收市升幅少咗一半。鋼鐵股呢排走勢落後大市，寶鋼亦宣布減鋼價，另方面鐵礦石價格則大升，所以鞍鋼管理層亦預計今年首季會賺少過舊年同期，但正所謂壞消息人人知，而日本地震嘅影響卻逐漸浮現，日本係全球最大鋼鐵出口國，就算鋼廠復工，但全國限電同物流網受創，有鋼材都留番重建自用，出口嘅缺口會由中國同南韓去填補，所以鋼鐵股第二季或有驚喜，正路可以買番啲鞍鋼。

戰報

海爾電器（01169）+24%

古晨上月二十九日睇中海爾電器，當日低位8.28元，尋日再創新高10.28元，累計升逾24%。

永保林業（00723）+26%

帥哥上月三十一日揀咗隻永保林業，尋日一度高見0.58元，以推介日低位0.46元計，累升26%。

古勝